Samir Ələkbərov: “Yığma Xorvatiyada bizi aldatdı”
Yunis Hüseynov: “Səviyyəmiz budusa, gəlin özümüzü aldatmayaq”
Beş gün ərzində bir rəsmi, bir yoxlama görüşü keçirən yığma bizə ikili hisslər yaşatdı. Düzdü, Nikola Yurçeviç yığmamızda qələbə sevinci yaşamaq üçün hələ azı iki ay, bundan bir qədər də çox gözləməlidi. Amma Xorvatiya və Litva ilə oyunlar düşünməyə əsas verdi. Baş məşqçi vətənində uduzsa da, bizi ümidləndirdi. Əvəzində Litva ilə qolsuz heç-heçə nəticələnən görüş əhvalı korladı.
Yurçeviçli yığmanın iki oyundakı çıxışına mütəxəssis gözü ilə baxmaq daha doğru olar. Odu ki, işsiz mütəxəssislərimizdən ikisinə - Samir Ələkbərovla Yunis Hüseynova tribuna verdik.
Samir Ələkbərov: “Yığma Xorvatiyada bizi aldatdı. Etiraf edək ki, komandamız seçmə oyunda uduzsa da, çox yaxşı təsir bağışladı. İlk olaraq rəqib qapısına yol tapdıq, daha sonra heç-heçə hesabını 79-cu dəqiqəyə kimi davam etdirdik. Sonda ustalıq sözünü desə də, futbolçularımızın döyüşkənliyi, mübarizə əzmi çox xoşuma gəldi. Bu gün bəziləri deyir ki, ay nə bilim Xorvatiya Yurçeviçə görə oynamadı, amma mən buna ciddi yanaşmıram. Xorvatlar qələbə üçün çox çalışdı və istəyinə çatdı. Sadəcə, bu komanda yaydakı Xorvatiya deyil. Bunu Macarıstan bir daha sübut etdi. Kapitanları Luka Modriç də mətbuata müsahibəsində bunu etiraf edib. Onlar hələ dünya ikincisi ab-havasından ayılmayıblar. Yığmamız vitse-çempionlara layiqincə müqavimət göstərdi. Açığı, heyrətləndim ki, Yurçeviç sehrbazdı-nədi, üç gün ərzində komandanı necə tanıya, bu səviyyəyə çatdıra bilər. Ancaq Litva ilə oyun göstərdi ki, hələ ardıcıl iki oyunda yüksək səviyyədə oynamaq iqtidarında deyilik. Bu gün bütün dünyada hamı müdafiə oluna bilir. Ola bilsin, səfərdə normal müdafiə olunub əks-hücumları yaxşı icra etdiyimizə görə bizdə alınmışdı. Amma evdə istər-istəməz hücum etməlisən. Burda Litva müdafiədən çıxış edirdi, biz hücum qurmağa çalışırdıq. Ancaq alınmadı. Alınması üçün səviyyəli futbolçuların olmalıdı. Bizdə Modriç yoxdu axı (gülür). İstənilən halda, baş məşqçinin üstünə getməyin tərəfdarı deyiləm. Çünki bu, on günün komandasıdı. Ola bilsin, hücumu gücləndirə biləcək. Qarşıda vaxt var, gözləyək, görək nə olur”.
Yunis Hüseynov: “Hamı gözləyirdi ki, Xorvatiya bizə üçünü, dördünü vurub yola salacaq. Amma olmadı. Bilirsiz, niyə? Çünki Xorvatiya o Xorvatiya deyil. Bunu mən demirəm, nəticələri göstərir. Dünya çempionatından sonra komandada xeyli dəyişiklik olub. Özləri də etiraf edirlər ki, zəifləyiblər. O ki qaldı məşqçinin işinə, yeni heç nə görmədim. Axı 10 nəfərlə müdafiə olunan komandada nə yenilik görə bilərsən? Hansısa taktika yox idi, Şeydayev istisna olmaqla, hamı cərimə meydançasına doluşub hücumları dəf etməklə məşğul idi. İnsafən, pis müdafiə olunmadıq. O ki qaldı Litva ilə oyuna, açığı, rəqib son 15 dəqiqədə bizdən daha yaxşı təsir bağışladı. Gəlin boşuna xəyal qurmayaq. Onsuz da qrupdan çıxan deyilik, ya sonuncu, ya da dördüncü yeri tutacağıq. Ola bilsin, 5-6 xal topladıq. Bu nəyi dəyişəcək? Yurçeviç heç nəyi dəyişə bilməz. Yığma həmin yığmadı. İstər Yurçeviç olsun, istər Yunis olsun, istərsə də Mourinyo. Futbolu icraçılar, yəni futbolçular oynayır. Səviyyəmiz budusa, gəlin özümüzü aldatmayaq. Xəyallarımız puç olanda, sonra elə ən çox üzülən də biz oluruq”.
MİRAĞA