Sizin reklam burada

Marinadan tarixi addım və finala vəsiqə

Title
Marinadan tarixi addım və finala vəsiqə
Milli Gimnastika Arenasında keçirilən idman gimnastikası üzrə dünya kubokunda ikinci yarış günü yekunlaşıb. Dünən Marina Nekrasova növbəti finala vəsiqə qazanıb. Təmsilçimiz gimnastika tirində 12.566 xal toplamaqla 6-cı pillənin sahibi kimi finala adlayıb. Marinanın daha bir əlamətdar çıxışı sərbəst hərəkətlərdə olub. Belə ki, idmançımız gimnastika tarixində ilk dəfə qapalı idman geyimində öz proqramını icra edib və bununla da yeniliyə imza atıb. Marinanın “Sarı gəlin” musiqisinin notları altında, çətin elementlərdən ibarət nümayişi tamaşaçılar tərəfindən də böyük maraqla qarşılanıb.
Təsnifat mərhələsində ən yüksək icra xalını toplamış idmançılara ənənəvi Azərbaycan Gimnastika Federasiyasının kuboku - “AGF Trophy” təqdim edilib. Mükafata Ceyd Keri (ABŞ) və Konstantin Kuzovkov (Gürcüstan) sahib çıxıb.
Qeyd edək ki, bu gün və sabah dünya kubokunda final mərhələləri baş tutacaq. Təmsilçilərimiz ümumilikdə 4 alət üzrə medallar uğrunda mübarizə aparacaq. Marina Nekrasova dayaqlı tullanma, Murad Ağarzayev sərbəst hərəkətər, Nikita Simonov isə halqalarda məharətini göstərəcək.
Yeri gəlmişkən, həftəsonu Kiyevdə bədii gimnastika üzrə "Deryuqina kuboku" keçiriləcək. Turnirdə Siyana Vasileva, Aliyə Paşayeva, Ayşən Bayramova, Diana Doman və Səbinə Hümmətovadan ibarət qrup hərəkəti komandamız mübarizə aparacaq.
Football-plus.az Məlumatlardan yararlandıqda istinad vacibdi. ✔ Məlumatlardan internet səhifələrində yararlanarkən müvafiq keçidin qoyulması vacibdi.