Rüstəm Rəhimov: “Kamran Quliyevlə canlı telefon bağlantısı oldu”
Martın 9-da “Neftçi”nin veteran futbolçusu, 1966-cı ildə SSRİ çempionatının bürünc medallarını qazanan kollektivin üzvü, gənclər arasında Avropa çempionu olan Nikolay Smolnikov 70 illik yubileyini qeyd edib. Yubilyar özəl gününü Moskva ətrafındakı Ximki şəhərində, “ağ-qaralar”ın digər veteran futbolçusu Rafiq Quliyevə məxsus “Mariya” restoranında qeyd edib. Bu haqda məlumatı yubiley tədbirinə qatılan beynəlxalq dərəcəli hakim, Respublika Futbol Veteranları İttifaqının vitse-prezidenti Rüstəm Rəhimovdan aldıq.
Yubileylə bağlı tədbirdə iştirak etmək üçün Rusiyaya yollanan Rüstəm bəyi dinləyək: “Özünüz də bilirsiz ki, SSRİ çempionatının “bürünc”ünü qazanan “Neftçi”nin heyətində olan futbolçulardan həyatda qalanların sayı çox azdı. Onlardan biri də Nikolay Smolnikovdu. Bir neçə gün öncə Nikolay 70 yaşını qeyd etdi. Yubiley tədbiri “ağ-qaralar”ın daha bir veteran futbolçusu Rafiq Quliyevin Ximki şəhərindəki restoranında qeyd olundu. Mən də AFFA, “Neftçi” və Respublika Futbol Veteranları İttifaqı tərəfindən həmin məclisdə iştirak etdim. Yubiley tədbirində flaqmanın sabiq futbolçuları Rafiq Quliyev, Rafiq Əlizadə, Vitali Şevçenko, Boris Zubkov, Viktor Semyonnikov və “Neftçi”nin sabiq inzibatçısı Vyaçeslav Lyoqki xanımları ilə birgə iştirak edirdilər. Ötən əsrin 60-70-ci illərində respublikanın əsas komandasının şərəfini qorumuş, hazırda Rusiya Futbol Veteranları İttifaqının prezidenti Aleksandr Mirzoyan da tədbirə qatılanlar arasında idi. Onunla görüşmək istəməsəm də, özü mənə yaxınlaşıb, əl verib salamlaşdı, kef-əhval soruşdu. Ardınca “mən də “Neftçi”nin heyətində çıxış etmişəm, orda parlamışam. Bu klubu özümə doğma hesab etdiyim üçün özümə borc bildim ki, Smolnikovun yubileyində iştirak edim” söylədi. Çox gözəl, nostalji dolu tədbir oldu. Ziyafətdə iştirak edənlərin hər biri 60-70-ci illəri yada saldı, “Neftçi”dəki günləri xatırladı, Bakı və Azərbaycan barədə xoş sözlər səsləndirdi. Müxtəlif millətlərin nümayəndələrinin vətənim barədə şirin sözlər deməsi istər-istəməz məni də çox sevindirdi. AFFA, “Neftçi” və Veteranlar İttifaqı adından çıxış eib yubilyara dəyərli hədiyyələr təqdim etdim. Smolnikovdan başqa fevralın 20-də ad gününü qeyd edən Rafiq Əlizadəyə də xatirə hədiyyəsi təqdim etdim. Tədbirin gedişində “Neftçi”nin prezidenti Kamran Quliyevlə canlı telefon bağlantısı oldu. Prezident klubun veteranı, 70 yaşını qeyd edən Smolnikovu təbrik etdi, məclis iştirakçılarını salamladı. Quliyevin səmimi danışığı, yubilyarı təbrik etməsi veteranlar tərəfindən də xoş qarşılandı. Eduard Markarov xəstəxanada olduğundan ziyafətə qatılmasa da, telefonla yubilyarı təbrik etdi və “bürünc Neftçi”ni indiyədək xatırladığını, bakılı azarkeşlərin komandaya necə dəstək verdiyini bir daha yada saldı. 8 saatdan artıq çəkən ziyafətdə hamı çıxış edərək, Azərbaycan, Bakı və “Neftçi” barədə xoş fikirlər səsləndirdilər”.
RƏŞAD