Haşımov Boykonun oyunun öhdəsindən gəldiyini düşünür

“Cavid Hüseynova ikinci sarı vərəqə göstərib, meydandan qova bilərdi”
Yığma AÇ-2020-nin seçmə mərhələsinin son oyununda Slovakiyaya da məğlub oldu. Trnavada keçirilən qarşılaşma ev sahibinin 2:0 hesablı qələbəsi ilə başa çatdı. Demək olar ki, görüşün əvvəldən sonunadək rəqibin üstünlüyü ilə keçməsi oyunda hər hansı mübahisəli məqamın olmasına imkan vermədi. Bununla belə, Slovakiyanın bir qolu oyundankənar vəziyyət üzündən qeydə alınmadı. Ukraynalı hakim Sergey Boykonun idarəçiliyini dəyərləndirməsi üçün sabiq hakim Ceyhun Haşımova müraciət etdik: “Ukraynada cərəyan edən siyasi qalmaqal zamanı “Dinamo” – “Şaxtyor” matçını idarə edən hakimlər briqadası bu görüşdə ciddi səhvə yol vermədi. Yalnız 10-cu dəqiqədə Eddi İsrafilovun epizodunda baş hakim oyunçumuza şifahi xəbərdarlıq etdi. Hansı ki, burda sarı vərəqə də göstərmək olardı. İlk hissəsinin sonlarında isə hakimin haqlı olaraq bir neçə epizoda müdaxiləsinin şahidi oldum. Birinci hissə ilə müqayisədə hakimlərin işi fasilədən sonra daha çətin oldu. Buna rəğmən, baş hakimin və köməkçilərinin qərarları doğru idi. Slovakiyanın sayılmayan qolunda da yan xətt hakimi düzgün qərar vermişdi. Hətta ehtiyat hakimin də bir neçə epizodda ədalət təmsilçisinə kömək etdiyi göründü. Sergey Boykonun fiziki hazırlığı yaxşı səviyyədə, mövqe seçimləri epizodlara uyğun idi. Xüsusən hava mübarizləri zamanı epizodları düzgün qiymətləndirir və ehtiyatsız qayda pozuntularının qarşısını alırdı. Ancaq epizodların birində Cavid Hüseynova ikinsi sarı vərəqə göstərib, meydandan qova bilərdi. Ukraynalı yalnız cərimə təyin etməklə kifayətləndi. Halbuki qırmızı vərəqə göstərsəydi, onu dəstəkləmək olardı. Ümumilikdə hakimlər briqadası qeyri-müəyyən qərarlarla yadda qalmadı, oyunun öhdəsindən yaxşı gəldi”.
HƏSƏN