10 mar 20:01olke

Folprext “Neftçi”ni və ölkəmizi təriflədi

Folprext “Neftçi”ni və ölkəmizi təriflədi
“Çexiya ilə müqayisədə burda futbolçular texniki cəhətdən daha yüksək səviyyəlidi”

Qış fasiləsində “Neftçi” ilə anlaşan Zdenek Folprext ölkəsinin mətbuatına geniş müsahibə verib. İcarə əsasında “ağ-qaralar”ın formasını geyinən 26 yaşlı yarımmüdafiəçi ölkəmizdəki karyerası ilə bağlı maraqlı fikirlər səsləndirib. Folprext azərbaycanlıların Praqanı, çex qızlarını və bu ölkənin pivəsini bəyəndiyini vurğulamağı da unutmayıb.
- Dostlarım hansı ölkəyə yollandığımı biləndə, orda terror hadisələrinin olub-olmadığını, mal-qaranın küçələrdə gəzib-gəzmədiyini soruşdular. Şəhərin şəkillərini onlara göndərəndə isə hamısı heyranlıqdan məəttəl qaldı. Amerikada, San-Fransiskoda yaşayan dostum da Bakının çox gözəl şəhər olduğunu dedi.
- Yaxınlarınız Çexiyada qalmağınızı istəyirdilər?
- Ailəmdən ötrü darıxıram. Liberetsdə ailəmə yaxın idim, tez-tez bacımın oğlunu görməyə gedirdim. İndi ondan uzağam. Bundan başqa, valideynlərim də yanımda deyil. Onlarla hər gün “skype” vasitəsilə əlaqə saxlayıram.
- Bakıdan razılıqla danışdız. Bəs Azərbaycan futbolu barədə nə deyə bilərsiz?
- Çexiya ilə müqayisədə burda futbolçular texniki cəhətdən daha yüksək səviyyəlidi. Amma fərdi keyfiyyətlərlə iş bitmir. Bir misal çəkəcəm. Biz “Slovan”la “Qarabağ”a qalib gəlmişdik. Turnirdən asılı olmayaraq, çexlər, yaxşı nəticə qazanmaq şansları varsa, bundan istifadə edirlər. Yəni biz komanda şəklində mübarizə aparırıq.
- “Neftçi”dəki karyeranızı necə qiymətləndirirsiz?
- Keçirdiyimiz 7 oyunun hamısında forma geymək şansı qazanmışam. Yaxşı çıxış edirik. “Neftçi”yə keçəndə komandanın 9 xalı var idi. Qış fasiləsindən sonra isə 11 xal toplaya bildik. Lakin bizim üçün çox vacib olan son oyunda məğlubiyyətlə üzləşdik. Azərbaycan çempionatında legioner limiti var. Əsas heyətdə 5 yerli futbolçu meydana çıxmalıdı. Deməli, əcnəbilər üçün 6 yer qalır ki, bizim komandada üç yeri müdafiəçilər tutur. Bu da mənim işimi bir qədər çətinləşdirir. “Neftçi”də 6 yer uğrunda 11 legioner mübarizə aparır. Bu mənada komandada Çexiyada üzləşdiyimdən güclü rəqabət yaşanır. Səviyyəli azərbaycanlı futbolçu üçün hər şey rahatdı. O bilir ki, əsas heyətdə yer alacaq. Bizdə yarımmüdafiənin mərkəzində oynaya biləcək 3 legioner var. Onlardan yalnız biri, arada ikisi ilk “11-liy”ə düşür.
- “Neftçi”yə yeni gedəndə Antalyada 3 həftəyə yaxın toplanış keçdiz. Bir yerdə uzun müddət qalmaq necə mümkündü?
- Mən komandaya yanvarın 4-də qoşuldum. İlk dəfə idi ki, legioner həyatı yaşayacaqdım. Bu mənada hansı vəziyyətlə üzləşəcəyimi, “Neftçi”də digərləri ilə necə ünsiyyət quracağımı bilmirdim. Antalyada təlim-məşq toplanışında olan komandanın düşərgəsinə yollandım və digər 2 nəfərlə bir araya gəldim. Onlardan biri ukraynalı idi, o da mənim kimi komandaya yeni qoşulurdu. Digəri isə serbiyalı qapıçımız idi. Onunla danışmağa cəhd etdim, amma ingilis dilini yaxşı bilmirdi. Yalnız onu izah edə bildi ki, ingiliscə pis danışsa da, komandada bu dili ən yaxşı bilən odu. Bunu eşidəndən sonra bir qədər qorxdum və nə edəcəyimi düşündüm. “Neftçi”də bir həftə olduqdan sonra düzgün qərar qəbul etdiyimi anladım. Komandada mən və başqa futbolçulara nəsə lazım olursa, onu elə həmin gün təşkil edirlər. Klubda bu işlə təxminən 14 nəfər məşğul olur. Bu məni məmnun etdi. Təbii ki, düşərgədə ingilis dilini bilən tərcüməçi var. Hər halda, onsuz mənə çətin olardı. Məndən bir neçə gün sonra kollektivə Pavel Dreksa qoşuldu. Vaxtımızı, demək olar ki, bir yerdə keçiririk. Bu isə işimizi asanlaşdırır.
- Çexiyadan gəlmiş futbolçular komandada necə qarşılandılar? Siz “Neftçi”ni gücləndirə bilmisiz?
- Yeni gələndə komanda yoldaşlarım üstümə düşüb, “Slovan” “Qarabağ”ı necə oldu ki, 3:0 hesabı ilə məğlub etdi” sualını verirdilər. Çünki Azərbaycanda məhz “Qarabağ” “Qəbələ” ilə çempionluq mübarizəsi aparır və ölkənin ən varlı klubu sayılır. “Neftçi”də ən təcrübəli futbolçu təxminən 30 yaşı olan gürcü müdafiəçi Georgi Navalovskidi. O, 5 il Rusiya çempionatında oynayıb. Mən “Neftçi”nin oyunçusu kimi təqdim ediləndə bildirdilər ki, komanda üçün vacib transferəm. İnstaqramda şəkil paylaşanda azarkeşlər həmişə öz fikirlərini yazırlar və güvəndiklərini bildirirlər.
- Azərbaycanda radio verilişində qonaq olanda gitara çalıb, mahnı oxumusuz...
- Gitara çalmaq məsələsinin tarixçəsini danışım. Mən masajçımla birlikdə Türkiyədə istirahət edəndə, o mənə instarqamda gitara çalmağımla bağlı paylaşdığım videonu gördüyünü dedi və nə vaxtsa bunu təkrarlamağımı istədi. “Slovan”da azarkeşlərlə görüş keçirmişdik, təxminən 100 fanat gəlmişdi. Klubumuzda gitara var idi. Azarkeşlərdən biri gitara çalmağımı istədi. Mən də çex mahnıları səsləndirdim. Sonra azarkeş həmin videonu internetdə paylaşdı. Bakıda isə bu yaxınlarda məni radioda verilişə qonaq çağırmışdılar. Onlar mənim üçün gitara da təşkil etmişdilər. Əvvəlcə tərəddüd etsəm də, sonra gitara çalmağa razılaşdım.
- Bakıda “Slovan”ın oyunlarına baxmaq imkanınız var?
- Əlbəttə, var. Amma son oyunlarına baxa bilmədim. Buna baxmayaraq, “Slovan”ın futbolçuları ilə əlaqəm davam etməkdədi.
- Ekzotik ölkə olan Azərbaycana gedişiniz necə alındı?
- Vəziyyət elə gətirdi ki, Azərbaycana yollanmaq şansı əldə etdim. Bunu ailəmlə müzakirə etdim və yekunda qərarımı verdim. Hələ ayyarımdı ki, Bakıdayam və bu müddətdə rus dilini öyrənə bilmişəm. Azərbaycanlıların fərqli mədəniyyəti var. “Neftçi”dəki karyeram cəmi 4 ay çəkəcəksə belə, həyatımda verdiyim qərarlardan yenə narazı qalmayacam.
- Bir çexiyalının Bakı həyatını necə təsvir etmək olar?
- Azərbaycanda çox yaxşı və dostcanlı insanlar var. Onlar sizin əcnəbi olduğunuzu və hansısa məsələ ilə bağlı kömək istədiyinizi görəndə, dərhal yardım edirlər. Misal da gətirə bilərəm. Bir dəfə maşınımı düzgün park etməmişdim və qayıdanda avtomobilin yerində olmadığını gördüm. Qarşıma çıxan ilk taksiyə əyləşərək, vəziyyəti ona izah etdim. Taksi sürücüsü nə baş verdiyini anladı və maşınımın aparıldığı cərimə meydançasının harda yerləşdiyini bildiyini dedi. Bizi dərhal ora apardı. Yeri gəlmişkən, həmin vaxt güclü yağış yağırdı. Könüllü şəkildə mənim problemimlə maraqlandı və cərimə meydançasına yollandıq. Mənə dostumla birlikdə maşında gözləməyi tapşırdı. 20 dəqiqə ərzində hər şeyi həll etdi və maşınımı geri qaytardılar. Taksi sürücüsündən ona borcumun nə qədər olduğunu soruşdum. O isə çiyinlərini çəkərək, bilmədiyini dedi. Sürücüyə pul verəndə mənə minnətdarlığını bildirdi. Halbuki daha çox təşəkkür etməli olan mən idim. Bəzən küçədə gəzərkən haralı olduğumu soruşurlar. Çexiyadan gəldiyimi biləndə Praqanı gözəl, tarixi şəhər adlandırırlar. Bəziləri isə Çexiyanın pivəsini və qızlarını tərifləyir (gülür).
RƏŞAD hazırladı
Şərh yaz
Ваше Имя:
Ваш E-Mail:
Yağlı Əyilmiş Xətt altdan Xətt öndə | Sol tərəflə yığ Mərkəzdə Sağ tərfdə yığ | smayl qoşmaq Bağlantı qoşmaqBağlantı ilə qorunan Rəng seçimi | Gizli mətn Məqalə qoş seçilən mətni kril əlifbasına çevir Spoyler
Введите код:

Son xəbərlər
Dünən, 13:11 Mehdi AZAL-ı seçməyindən məmnundu Dünən, 13:09 Olimpiya çempionu “Kəpəz”dən danışdı Dünən, 13:07 “Traktorsazi” əzəli rəqibinə qalib gəldi Dünən, 13:05 Əvəzedicilərin çempionatında həlledici sonluq Dünən, 13:03 Şimallılar üçün mövsümün son oyunu Dünən, 13:02 Avstriya “Qarabağ”ı Bakıda futbolçu seçəcək Dünən, 13:00 İlümjinov Şəmkiri Linaresə bənzədir Dünən, 12:58 Teymur titulu Şəhriyardan almaq üçün əlindən gələni edəcək Dünən, 12:56 Şəmkirdə 100 min avro uğrunda mübarizə başlayır Dünən, 12:53 Finalın hakimi kim olacaq? Dünən, 12:51 MOİK islahatlara başladı: 8 futbolçu qovuldu Dünən, 12:50 Qətərdən səs çıxdı, diskdən yox Dünən, 12:45 “Sumqayıt” Kamerun yığması ilə qarşılaşacaq Dünən, 12:43 Premyer-liqanın üç klubu "Qarabağ"ı təbrik etməyib Dünən, 12:42 Oynadı və “sarı” aldı Dünən, 12:40 Çempion ola bilməməyin səbəbini dedilər... Dünən, 12:38 “Qarabağ” “qızıl”a “Azərsun Arena”da qovuşacaq Dünən, 12:36 “Mehdi Hüseynzadə”də işlər dayanıb Dünən, 12:35 Yaşar Vahabzadə İslamiadanın təqvimindən razıdı Dünən, 12:33 Eltac Səfərli İsveçrəni “fəth etdi” Dünən, 12:31 Sergey Karyakin Vüqarın məzarını ziyarət etdi Dünən, 12:30 İslamiada xəbərləri Dünən, 12:28 Simaitis ehtiyatda qalmasını normal qarşılayır 22-04-2017, 00:49 Qrupda qaldıq... 22-04-2017, 00:47 Tellur özündən razı deyil 22-04-2017, 00:45 Dreksa qayıdır, Petrov “Zirə”yə qarşı oynamayacaq 22-04-2017, 00:42 “Eurosport” Adamsın Azərbaycan gündəliyini vərəqlədi 22-04-2017, 00:40 Ölkə çempionları bəllidi 22-04-2017, 00:39 Qonaqlar xala da, qola da həsrət qaldı 22-04-2017, 00:37 İştirakçıların çoxluğu Neymarı təəccübləndirib 22-04-2017, 00:34 Avroliqaya sonuncu vəsiqə kimin olacaq? 22-04-2017, 00:33 "Yaz turniri" başlayıb 22-04-2017, 00:31 4000 manata başa gələn 1 xal 22-04-2017, 00:30 Nicat Muxtarov 3200 manat ziyana düşdü 22-04-2017, 00:28 Təbriz Həsənov Makedoniyanı AÇ-dəki hansı rəqibimizə oxşatdı? 22-04-2017, 00:27 PFL “gümüş”lə “bürünc”ü Qəbələyə aparır 22-04-2017, 00:25 “İnter” dağılır: Səlahət gedir, başqaları son iki turu gözləyir 22-04-2017, 00:24 Maşallah Əhmədovun məsələsi yenidən araşdırılacaq 22-04-2017, 00:23 “Qarabağ” nominal meydan sahibi oldu 22-04-2017, 00:22 Klublar Komitəsi mövsümün sonunu gözləyir 22-04-2017, 00:17 Alina Kabayeva gimnastikamızdan ağızdolusu danışdı 22-04-2017, 00:16 Jidkova yığmanın uğur qazanacağına inanır 22-04-2017, 00:14 İslamiada xəbərləri 22-04-2017, 00:12 Avropa çempionatına iki “bürünc”lə başladıq 22-04-2017, 00:11 Fətəliyevanın məğlubiyyətsizlik seriyası qırıldı 22-04-2017, 00:09 Jurnalistlər “Xəzər Lənkəran”ı qınayır 19-04-2017, 20:19 Mənsimovlar, Hadisənin ayaqları altına səpdiyiniz pulumuzu qaytarın! 19-04-2017, 20:17 AFFA və PFL-dən Əsgər Abdullayevi təbrik etməyiblər 19-04-2017, 20:15 “Qırmızı”sız tur və 3500 tovuzlu 19-04-2017, 20:13 HAKİMLƏRİN MÜHAKİMƏSİ 19-04-2017, 20:11 Avropa Liqasının təqvimi müəyyənləşdi 19-04-2017, 20:09 Yığma kluba uduzdu 19-04-2017, 20:08 “İnter”də maaş problemi davam edir 19-04-2017, 20:06 TURUN SİTATI 19-04-2017, 20:04 TURDAN MƏQAMLAR 19-04-2017, 20:01 Niyə “Qəbələ” yox, “Qarabağ”? 19-04-2017, 19:59 TURUN OYUNÇUSU Bütün xəbərlər
Ən çox oxunanlar