“Xan Lənkəran” “Xəzər Lənkəran”ın stadionu üçün müraciət etdi

Hissə satışını davam etdirən “Xan Lənkəran”ın 2018/19 mövsümündə 1-ci divizionda iştirak etməyi planlaşdırdığını bilirsiz. Artıq bununla bağlı son tamamlayıcı texniki işlərin həlli yönündə addımlar atılır. Həftəsonuna qədər məşqçilər korpusu və komandanın hazırlıq planı haqda təqdimat xarakterli mətbuat konfransı keçiriləcək və məlumat veriləcək.
Dünən isə yeni yaranmış klubun İdarə Heyəti “Xəzər Lənkəran”ın stadionundan və məşq meydançasından icarə əsasında istifadə ilə bağlı stadion rəhbərliyinə rəsmi müraciət ünvanlayıb.
Artıq baş məşqçi müəyyənləşib. Ancaq adı hələ ictimaiyyətə açıqlanmayıb. Gəzən söz-söhbətlərə görə, bu indiyədək müxtəlif klublarımızda çalışmış təcrübəli mütəxəssis Asim İbrahimovdu.
Qeyd edək ki, hazırda hissə satışından və ianələrdən formalaşan klub büdcəsində 48540 manat cəmləşib. Hissə satışının ilk mərhələsinin iyulun 15-dək uzadıldığını da xatırladaq.
SƏRXAN