Rəşad Sadiqov karyerasını başa vurur

“Sabah”ın əvəzediciləri Binədə məşq edir
Seleksiya prosesini tamamlayan “Sabah” dünəndən təlim-məşq toplanışının əsas mərhələsinə start verib. “Əlincə Arena”da hazırlıq keçən komanda gündə iki məşqə çıxır. Gündüz əsasən fiziki, axşam isə taktiki-texniki çalışmalara üstünlük verilir. Transfer çalışmaları da davam edir. Ön xəttə ən azı iki legionerin transfer edilməsi nəzərdə tutulub.
Ancaq Rəşad Sadiqovla aparılan danışıqlar uğursuzluqla nəticələnib. Tərəflər arasında ilkin razılıq olsa da, təcrübəli futbolçu son anda elitanın debütantı ilə birillik müqavilə bağlamaqdan imtina edib. 34 yaşlı yarımmüdafiəçi yaşadığı Buzovnadan hər gün Masazıra gəlib-getməyin yorucu olduğunu düşünür.
Qeyri-adi nəsə baş verməsə, Sadiqov karyerasını başa vuracaq. Rəşadın karyerasında əsas yeri “Neftçi” tutur. “Bakı” (1998/99) və “Şəfa”da (2000-02) oynadıqdan sonra 2003-də “ağ-qaralar”a keçən dayaq yarımmüdafiəçisi 2008-dək flaqmanda çıxış etdi. Alman baş məşqçi Hans-Yürgen Gede ilə yola getməyən Sadiqov 2009-dan 2012-dək “Qarabağ”ın şərəfini qorudu. Onun “Neftçi”yə qayıdışı uğurlu alındı. Komandanın Avroliqanın qrupuna vəsiqə qazanmasında pay sahibi olan Rəşadın “Cüzeppe Meatsa”da “İnter”in qapısından keçirdiyi möhtəşəm qol hələ də yaddaşlardan silinməyib. 2014-də “Xəzər Lənkəran”ın daha yaxşı maliyyə təklifinə “hə” deyən futbolçu cənubda çox duruş gətirmədi. “Qəbələ” (2015-17) ilə yenidən parlayan və növbəti dəfə Avroliqanın qrup mərhələsinin həyəcanını yaşayan yarımmüdafiəçinin “Zirə”dəki çıxışının qısa müddət çəkməsinin səbəbi baş məşqçi Ayxan Abbasovla mübahisə etməsiydi. Tərlan Əhmədovun istəyi ilə son mövsümdə “Neftçi”yə qayıdan Sadiqov bu mütəxəssisin komandadan ayrılmasıyla “ağ-qaralar”dan uzaqlaşdı. Rəşadın əsas yığmada 20 oyun keçirdiyini və 1 qol vurduğunu da nəzərinizə çatdıraq.
Sonda onu da qeyd edək ki, “Sabah”ın əvəzedicilərdən ibarət komandası başqa məkanda hazırlıq keçir. Vasif Haqverdiyevin yetirmələri Binə stadionunda məşq edir.
SƏRXAN