“CBC Sport” AÇ-ni yayınlamaq üçün danışıq aparır

Futzal üzrə Avropa çempionatının startına üç həftədən az qalıb. Hazırda təlim-məşq toplanışında olan yığmamız yanvarın 27-də final mərhələsinə evsahibliyi edəcək Sloveniyaya yola düşəcək. Məlum olduğu kimi, Joze Alesio da Silvanın komandası qrupda Fransa və İspaniya ilə birgə yer alıb. Fransızlarla görüş fevralın 2-də, qitə nəhəngiylə isə ayın 4-də baş tutacaq. Hər iki oyun Lyublyana şəhərindəki “Stojice Arena”da baş tutacaq. İlk matç Bakı vaxtı ilə saat 21.00-da, ikinci isə 23.45-də start götürəcək.
Final mərhələsinin oyunlarının ölkəmizdə yayınlanıb-yayınlanacağı azarkeşləri maraqlandırmaya bilməz. Onlara şad xəbər vermək istərdik, ancaq hələ bunun üçün tezdi. Hazırda təşkilatçılarla “CBC Sport” arasında danışıqlar gedir. Telekanalın rəsmisi Şəmsəddin Abbasov bir qədər səbr etməyi məsləhət gördü: “Bu gün sizə dəqiq nəsə demək üçün tezdi. Biz də çalışırıq ki, yığmanın oyunlarını ölkəmizdə çanlı izləsinlər. Hazırda danışıqlar gedir. Nəticəsi barədə sizi məlumatlındaracağıq”.
MİRAĞA