“Kəpəz”dən ayrılandan sonra gecə ilə gündüzü səhv salmışam”
- Salam. Sizinlə görüşmək üçün Gəncəyə gəlmişəm. Sizi necə görə bilərəm?
- Mən indi başqa yerdəyəm, vaxt olsa, görüşərik.
- Mənə konkret vaxt deyə bilərsiz?
- Dəqiqi vaxt deyə bilməyəcəm. Hər halda, zəng vurarsız.
- İlyarımdı zəng vururam, cavab vermirsiz. Bu dəfə istəyimə çatmasam, gedən deyiləm.
- Yaxşı, saat 5-də bu ünvanda (ünvanı deyir, sadəcə, yazımıram) görüşərik.
Dediyi vaxtdan təxminən 20 dəqiqə tez gəldim. Ancaq o məni qabaqlamışdı və maşını artıq orda idi. Həmişəki kimi idman geyimində və əlində siqaret. Pilləkəndə durub mənə baxsa da, fikrinin başqa yerdə olduğu hiss olunurdu. Birdən görüncə, “Allah səni saxlasın, telefonda elə rəsmi danışdın ki, dedim, görən bu kimdi. Niyə tanışlıq vermədin, niyə həmişəki kimi demədin ki, Rəşaddı, “Futbol+”dən”. Görüşüb hal-əhval tudandan sonra o yenə söhbətinə davam edir: “Səhərdən aləmi bir-birinə qatmışam ki, bu kimdi, mənimlə ərkyana danışır”.
Yəqin söhbətin kimdən getdiyini başa düşdüz. Bu şəxs adını “Kəpəz”in tarixinə qızıl hərflərlə yazdırmış, həm futbolçu, həm məşqçi, həm də funksioner kimi klubun uğurları üçün çalışmış Mehman Allahverdiyevdi. Özünün dediyi kimi, ilyarımdı “dağlara çəkilən” 58 yaşlı mütəxəssislə xeyli vaxt idi, daha dəqiq desəm, “Kəpəz”dən ayrılandan sonra danışmaq istəyirdim. Ancaq alınmırdı. Ya telefonuna zəng çatmırdı, ya da zəngə cavab vermirdi. Nəhayət, ötən həftənin şənbə günü onunla görüşüb söhbətləşə bildim. Düzdü, əvvəlcə razılıq vermədi. Ancaq müsahibə üçün Gəncəyə gəldiyimi nəzərə alıb, özü demişkən, “çox da dərinə getmədən” suallarımızı cavabladı.
“Bu yaşdan sonra da yeni peşə öyrənməyim qeyri-mümkündü”
- Xeyli vaxtdı sizdən xəbər-ətər yoxdu. Hazırda nə işlə məşğul olursuz, boş vaxtınızı necə keçirirsiz?
- Artıq ilyarımdı futboldan uzaq düşmüşəm. Ancaq ruhən yenə futbolun işindəyəm. 10 yaşımdan top məni, mən də topu tanımışam və bu günə kimi də bir-birimizdən ayrı qala bilmirik. Uşaq yaşlarımdan bu sahədə addım atıb bütün yaş qruplarını uğurla keçərək peşəkar futbolçu olmuşam. Karyerama nöqtə qoyandan sonra isə artıq baş məşqçi kimi çalışmışam. Bundan başqa, müxtəlif illərdə “Kəpəz”də rəhbər postları tutmuşam. Deməyim odu ki, istər uşaq futbolunun, istər peşəkar komandanın nə olduğunu yaxşı başa düşürəm. İdarəçiliyin də nə olduğunu bilirəm. Bir sözlə, həyatım futbola bağlı olub. Açıq deyirəm, futboldan başqa əlimdən heç nə gəlmir. Bu yaşdan sonra da yeni peşə öyrənməyim qeyri-mümkündü. Qardaşım Füzuli də mənim kimi ancaq futbolla nəfəs alır. Futbol oynadığı dönəmdə ona bir çox klublardan sərfəli təklif gəlsə də, heç hara getmədi və 20 il “Kəpəz”in şərəfini qorudu. İndi belə futbolçu tapa bilərsiz? Biz iki qardaş canımızı, qanımızı qoymuşuq Gəncə futbolu üçün. Bunu heç nədən çəkinmədən açıq-aydın deyriəm. Bu gün də eyni həvəs və istəklə bu işi davam etdirməyə hazırıq. Bəlkə də indi söyləyəcəklərim kimlər üçünsə gülməli görünə bilər. Ancaq reallığı sizə deyirəm. “Kəpəz”dən ayrılandan sonra gecə ilə gündüzü səhv salmışam. Gecələr gözümə yuxu getmir, səhərə yaxın, 6-da, 7-də 3-4 saat gözümü yumuram. Bütün gecə Avropadakı oyunları izləyir, mətbuatda yazılanları oxuyuram. Təbii ki, premyer-liqa matçlarını da diqqətdə saxlayıram. Gündüzlər isə arada dostlarla bir araya gəlirik. Onda da başqa mövzulardan danışsaq da, istər-istəməz sonda söz yenə futboldan düşür. Arada qohumlara baş çəkirəm, nəvələrlə baş qatıram. Ancaq özümü çox narahat hiss edirəm. Çünki sevdiyim işdən uzaq düşmüşəm. Balıq sudan ayrı qala bilməyən kimi, mən də futboldan uzaq qala bilmirəm.
- Futboldan kənarda qaldığınız ilyarımda premyer-liqada nələr dəyişib? Kənardan ölkə çempionatı necə görünür?
- Bildiyiniz kimi, mənim həyatım Gəncə futboluna bağlı olub. Düzdü, futbolçu kimi bir neçə il “Neftçi”nin də şərəfini qorumuşam. Lakin hamı məni gəncəli Mehman kimi tanıyıb. Ona görə də məşqçi kimi başqa klublardan gələn təklifləri həmişə geri çevirmişəm. 10 il birnəfəsə “Kəpəz”in baş məşqçisi işləmişəm və nəticələr də göz qabağındadı. Nə məndən öncə, nə də məndən sonra çalışanların heç biri bunu bacarmayıb. Ona görə də mən sizinlə ancaq “Kəpəz” barədə danışmaq istərdim. O biri klublar mənim üçün maraqlı deyil. Allahdan arzulayıram ki, Mehman Allahverdiyev oldu-olmadı, “Kəpəz” tezliklə əvvəlki şan-şöhrətini özünə qaytarsın və premyer-liqanın iddialı klubları ilə bir sırada olsun.
- 2016-cı ildə “Kəpəz”dən ayrılandan sonra mətbuatdan qaçaq düşmüsüz. Neçə dəfə sizinlə telefonla əlaqə saxlamaq istəsək də, zənglərimizə cavab verməmisiz. Mediadan küsmüsüz, yoxsa kölgəyə çəkilməyinizin başqa səbəbi var?
- Jurnalistlər arasında xətrini istədiyim xeyli insan var. Lakin durumu nəzərə alıb mətbuatdan kənar durmağa çalışdım.
- Durum deyəndə nəyi nəzərdə tutursuz?
- Dostlarım inciməsin, bəzən müsahibə verəndə demədiyim sözləri ora əlavə edib intirqa yaratmağa çalışırlar. Medianı başa düşürəm, onlara bu lazımdı. Lakin istəmirəm ki, müzakirə mövzusu olum.Hərdən elə yersiz suallar da verilir ki, lap özümdən çıxıram. Onda da deyirlər ki, bunu işləyəndə yox, indi dilinə gətirirsən. İlyarımda müraciət edənlər çox olsa da, hamıya “yox” cavabı vermişəm. Açıq deyirəm, sən müsahibə üçün Gəncəyə gəlməsəydin, danışmazdım. Baxmayaraq ki, səninlə aramızda haqq-salam var, bir-birimizin xətrini çox istəyirik, ancaq özümə söz vermişdim. Sənin gəlişin məni yoldan çıxardı. Necə deyərlər, dost yolunda boran olar, qar olar.
“İstər-istəməz gözümdən yaş gəldi”
- Sizin “Kəpəz”dən ayrılmağınız bir qədər gözlənilməz oldu. Bəlkə indi bu məsələyə aydınlıq gətirəsiz?
- Nəyi bilmək istəyirsiz?
- Klubdan getməyinizin səbəbini?
- Bəzi məsələlər barədə oturub fikirləşdim və bir qədər dincəlməyə qərar verdim.
- Ancaq ictimaiyyət arasında başqa fikirlər dolaşır. Söylənilənlərə inansaq, başda Mikayıl Nərimanoğlu olmaqla klubda maliyyə yeyintisinə yol verənlər bilərəkdən sizi klubdan uzaqlaşdırblar ki, istədiklərini həyata keçirə bilsinlər.
- Bununla bağlı heç nə söyləmək istəmirəm. Mən də çoxları kimi başverənləri mətbuatda oxudum. Bilirsiz, belə hallar tək Azərbaycan futbolunda yox, çox ölkələrdə olur. Ancaq bizdə bu cür məsələlərə xüsusi yanaşma var. Bəzən qarışqadan fil düzəltməyi xoşlayırıq. Azərbaycanda gözəl atalar sözü var: “yıxılana balta vurmazlar”. Ancaq indi yıxılanı nəinki baltalayırlar, hətta alnına güllə də sıxırlar ki, birdən balta yarasından sağalar. Açığı, bilirdim ki, məndən də yaşananlara münasibət öyrənməyə çalışacaqlar. Ona görə də zəngləri cavabsız qoyurdum. İndi durub mən də əvvəlki rəhbərliyi tənqid etsəm, deyəcəklər ki, Mehman fütsətdən istifadə edib qisas alır. Bu da mənə yaraşmaz. Onu da bildirim ki, klubdan ayrılandan sonra heç stadiona da getmirəm ki, söz-söhbət yaranmasın. Fikirləşərlər ki, görəsən, Mehman nə yaxşı burdadı? Bu fikir istər-istəməz yaranacaq. Bəli, “Kəpəz” uduzanda çox məyus oluram, özümü pis hiss edirəm. Ancaq barəmdə yanlış fikirlərin formalaşmasını istəmirəm. Halbuki o stadionda nə qədər əziyyətim olub. Rəhbər vəzifədə ola-ola meydanı qardan təmizləmişəm, günün altında ot sulamışam. Vaxt olub ki, komandaya öz cibimin pulunu xərcləmişəm. Yəni haqqım çatır ki, günün 24 saatı stadionun darvazasını açıb içəri daxil olum. Bu gün Azərbaycanın ən böyük problemi Qarabağdı. Hamı o gözəl torpaqların geri qayıdacağı günü gözləyir. İnanıram ki, ölkə prezidentinin rəhbərliyi altında tezliklə işğal altında olan torpaqlarımız da geri qayıdacaq, Mehman Allahverdiyev də futbola dönəcək. Bu gün doğrudan da mənim üçün çətindi. İllərboyu stadionda olan, onun hər əziyyətini çəkən adam nəyə görəsə bu gün ora gedə bilmir. Bilirsiz, bu nəyə bənzəyir? Elə bil bu gün təzə ev almısan, ancaq ertəsi başqa birisi gəlib onu tutub. Bir müddətdən sonra deyirlər ki, gəl evinə sahib çıx. Həmin adamın sevincini təsəvvür edə bilərsiz? Sonuncu iş günümdə kolektivlə vidalaşarkən, otaqdakıların üzlərinə baxıb necə məyus olduqlarını görmək çox ağır idi. İstər-istəməz gözümdən yaş gəldi. Ola bilsin, aralarında “postundan getdiyinə görə belə edir” düşünənlər oldu. Ancaq həqiqətən də mənə stadiondan, yaşıl meydandan, uzun müddət birgə çalışdığım kollektivdən ayrılmaq çətindi.
- Sizdən sonra Fizuli Allahverdiyev də “Kəpəz”dən uzaqlaşdırıldı. Söylənilənlərə inansaq, Fizuli bəy komanda uduzanda sevindiyinə görə rəhbərliyin qəzəbinə tuş gəlib.
- Komanda uduzanda, heç futbolçuların paltarlarını yuyan da sevinmir, o ki qaldı məşqçi ola. Biz bu gün “Kəpəz”də olmasaq da, komanda udanda sevinir, uduzanda məyus oluruq. Bu cür söz-söhbəti yayan, rəhbərliyə çatdıranlar bizləri istəməyən, gözü götürməyənlərdi. İnsanın ki, daxili çürük oldu, ondan nə desən, gözləmək olar. Həmin söz-söhbəti mən də eşitmişdim. Ancaq arxasınca düşüb heç maraqlanmadıq da ki, bu şər-böhtan maşını kim və ya kimlərdi... Biz qardaşların ürəyi ölənə qədər “Kəpəz”lə döyünəcək.
“Bu istirahət düşündüyümdən bir qədər çox çəkdi”
- Hazırda “Kəpəz”in baş məşqçisi yaxın dostunuz olan Yunis Hüseynovdu. Ancaq komanda yenə turnir cədvəlinin sonuncu pilləsindədi...
- Yunisi də qınamaq olmaz. O mövsümün gedişində baş məşqçi təyin olundu. Onunla çox yaxınıq, “Neftçi”də birgə oynadığımız dönəmdə bir otaqda qalmışıq. Gərək komandanı yayda özün formalaşdırıb, hazırlığı özün keçəsən ki, mövsüm ərzində nəyin necə olduğunu biləsən. Qışda Antalyada təlim-məşq toplanışı keçmək işin yarısıdı. Fasilə dönəmində heyətə əl gəzdirsə də, məncə, istədiyi kollektivi formalaşdıra bilmədi ki, bu da başadüşüləndi. Qışda həm vaxt azdı, həm də sənə lazım olan oyunçunu tapmaq çətindi. Ancaq hər halda, indiki “Kəpəz”lə qışdan əvvəlki komandanı müqayisə etmək düzgün çıxmaz. İndi kollektiv daha yaxşı təsir bağışlayır. İnşallah, özü dediyi kimi növbəti mövsümə daha güclü komanda yaradacaq və “Kəpəz” Yunis Hüseynovun rəhbərliyi altında uğurlar qazanacaq.
- Mehman Allahverdiyevin yenidən “Kəpəz”ə dönməsi kimdən və nədən asılıdı?
- Nə deyim? Mən istirahət etmək istəyirdim. Ancaq bu istirahət düşündüyümdən bir qədər çox çəkdi (gülür). Ruslarda bir söz var: “luçşe pozdno, çem nikoqda”. Təklif olsa, münasibət bildirərəm. Gəncə futbolunu düşünmək, ona can yandırmaq lazımdı. Küçədə və ya başqa yerdə azarkeşlər hər dəfə məni görəndə yaxınlaşırlar, “Kəpəz”in durumu ilə bağlı fikirlərini bildirirlər. Çalışıram hamısının fikirlərini dinləyim. Özünüz də dəfələrlə gəncəlilərin mənə olan münasibətini görmüsüz. Onlar bilirlər ki, Allahverdiyev hər zaman “Kəpəz”i adına layiq yerə ucaltmaq üçün gecə-gündüz bilmədən çalışıb. Ona görə də hörmətimi saxlayırlar. Bu gün həm ölkə prezidenti, həm də Gəncənin icra başçısı idmana və idmançılara böyük qayğı göstərir. Gəncədə son vaxtlar böyük abadlıq və quruculuq işləri aparılır. Belə gözəl, tarixi şəhərin komandası da Gəncənin yaraşığı və fəxri olmalıdı.
RƏŞAD