“Səbail” Emil Balayevi saxladı

“Səbail” transfer çalışmalarını davam etdirir. Ötən mövsüm birinci diviziona ikinci yer tutaraq, premyer-liqaya vəsiqə qazanan paytaxt təmsilçisi daha bir transferi reallaşdırıb. Samir Əliyev baş məşqçi postuna gəldikdən sonra aşağı dəstədə uğur qazanan heyətlə, demək olar ki, vidalaşıb. Gənc mütəxəssis sıfırdan komanda formalaşdıracağını açıqladı və sabiq futbolçularla yolları ayırdı. Ötən mövsümdəki heyətdən cəmi bir futbolçu qalıb. Qış fasiləsində "Səbail"ə qoşulan “Qarabağ”ın qapıçısı Emil Balayev növbəti mövsüm də “aslanlar”ın “çərçivə”sini qoruyacaq. Gənc qolkiper 2 illik müqaviləyə qol çəkib. Qapıçı özü də “Səbail”də qalmaq istəyib. Üstəlik, rəhbərlik onun transferi üçün şəxsən Qurban Qurbanovla danışıb və razılıq əldə edib. 23 yaşlı “əlcək sahibi” son mövsümdə “Səbail”in heyətində 11 oyuna çıxıb.
Qeyd edək ki, bu, “Səbail”in 15-ci rəsmi transferidi. Bakılılar indiyə kimi “Neftçi”dən Kamal Qurbanov, Eltun Yaqublu, Murad Ağayev, Aqşin Qurbanlı, Orxan Qurbanlı və Təyyar Məmmədovu, “Zirə”dən Yamin Ağakərimzadəni, “Zaqatala”dan Emin Mehdiyevlə Raul Yaqubzadə, "Turan Tovuz"dan Aqşin Muxtaroğlunu, AZAL-dan Emin Cəfərquliyevi, “Qarabağ”dan Vüqar Nadirovu, “Zirə”dən Nurlan Novruzovu və bir legioneri – Türkmənistanın “Altın Asır” klubundan Elman Taqayevi heyətinə qatmışdı. Komandaya daha bir neçə oyunçunun, o cümlədən azı bir legionerin gətiriləcəyi gözlənilir.
Xatırladaq ki, hazırlığı Bakıda davam etdirən komanda gələn ay Türkiyəyə təlim-məşq toplanışına gedəcək. Toplanış iyulun 10-dan 27-nə kimi davam edəcək.
ŞƏFİ ŞƏFİYEV