Fuad Musayev dünyadan köçdü

Dünən Moskvada AFFA-nın ilk prezidenti Fuad Musayev dünyasını dəyişib. O son vaxtlar tibbi müayinədən keçmək üçün tez-tez bu şəhərə baş çəkirdi. Böyrək çatışmazlığından əziyyət çəkən Musayev srağagün komaya düşüb və dünən saat 12 radələrində gözlərini həyata əbədi yumub.
SSRİ dövründə müxtəlif məsul vəzifələrdə çalışan Fuad bəy AFFA-nın yaradıcılarından biri və Azərbaycanın dünya futbol ailəsinə qoşulması yolunda zamanında böyük əmək sərf etmiş şəxsiyyətlərdən idi. AFFA-nın ilk prezidenti 2003-cü il dekabrın 29-da yerini Ramiz Mirzəyevə vermişdi.
Qəzetimizin daimi və sadiq oxucularından biri yanvarın 11-də 79 yaşını tamamlamışdı. “Futbol+” kollektivi Fuad Musayevin vəfatıyla bağlı yaxınlarına və ailə üzvlərinə kədərləndiyini bildirir, dərin hüznlə başsağlığı verir. Allah rəhmət eləsin.