Tural Hümbətovun Monteneqroda debütü uğursuz alındı

Cənubi Kipr çempionatının ilk “6-lığ”ında 6-cı turun oyunları keçirilib. “Anortosis” evdə AEL-in müqavimətini qıra bilməyib - 1:1. Start heyətində yer alan Araz Abdullayev 83-cü dəqiqədə əvəzlənib. 65 xalla ilk “3-lüy”ü qapayan “ağ-göylər” növbəti turda “Apollon”un qonağı olacaq.
2-ci bundesliqada 30-cu tur geridə qalıb. “Ertsgebirge” səfərdə “Arminiya”ya (0:2) uduzub və 9 oyunluq məğlubiyyətsizlik seriyası qırılıb. İlk “11-lik”də meydana çıxan Dmitri Nazarov 78-ci dəqiqədə əvəzlənib. 39 xalda qalan və 10-cu pilləyə geriləyən “bənövşəyilər” növbəti turda Auedə “Duysburq”u sınağa çəkəcək.
Regional Liqanın Şimal-Şərq zonasında “Dinamo” Leyptsiqdə “Kemi”yə yenilib – 0:1. Zədəli Rüfət Dadaşov bu oyunu da buraxıb. 53 xalla 2-ci yerdə gedən “ayılar” 30-cu turda “BAK-07” səfərinə yollanacaq.
Almaniyanın U-19 çempionatının Cənub zonasında “Ayntraxt” səfərdə “Nürnberq”ə məğlub olub – 0:2. Murad Mahmudov 90 dəqiqə oynayıb. 23 xalla ilk “10-luğ”u qapayan “qırmızılar” 24-cü turda Frankfurtda “Ştutqart”la münasibətləri aydınlaşdıracaq.
Sequndanın 35-ci turu çərçivəsində “Alkorkon” səfərdə “Lorka” ilə heç-heçə edib - 1:1. Eddi İsrafilov sonadək ehtiyatda qalıb. 42 xalla 15-ci sırada yer alan “Alkorkon" növbəti turda “Osasuna”nı qəbul edəcək.
Türkiyə superliqasında 29-cu turun oyunları keçirilir. “Gənclərbirliyi” səfərdə “Kayserispor”la bacarmayıb - 2:3. Dəniz Yılmaz yalnız ilk hissədə oynayıb. 30 xalla 15-ci pillədə qərarlaşan “qırmızı-qaralar” növbəti tur Ankara derbisində “Osmanlıspor”la qarşılaşacaq.
Ukrayna çempionatının ikinci “6-lığ”ında "Aleksandriya" səfərdə “Olimpik”lə qolsuz “sülh”ə razılaşıb. Pavel Paşayev 90 dəqiqə oynayıb. 30 xalla 2-ci yerdə gedən "Aleksandriya" 6-cı turda səfərdə “Çernomorets”lə üz-üzə gələcək.
Gürcüstanın 1-ci divizionunda “Şevardeni-1906” səfərdə “Telavi” ilə heç-heçə edib – 0:0. Fərid Nəbiyev matçı əvəzlənmədən keçirib. 8 xalla 4-cü sırada yer alan “Şevardeni-1906” 7-ci turda “Vit-Corciya”nı qəbul edəcək.
Monteneqro çempionatında 29-cu turun oyunları keçirilib. “Deçiç” doğma meydanda “Mladost”a müqavimət göstərə bilməyib - 1:4. Tural Hümbətov çempionatda ilk oyununa çıxıb və 90 dəqiqə mübarizə aparıb. Həmyerlimiz 40-cı dəqiqədə sarı vərəqə alıb. Hesabındakı 20 xalla sonuncu – 10-cu pillədə qərarlaşan “Deçiç” növbəti turda “Qrbal”ın qonağı olacaq.
SƏRXAN