Araz Abdullayev kubokdan əlini üzdü

Rüfət Dadaşov zədələnib
Cənubi Kipr kubokunda 1/4 finalın cavab oyunları keçirilib. “Apollon”la evdəki görüşdə 1:1-lik heç-heçəyə razılaşan “Anortosis” səfərdə uduzaraq mübarizəni dayandırıb – 1:2. Uzun fasilədən sonra start heyətində yer alan Araz Abdullayev 85-ci dəqiqədə əvəzlənib. Yığma üzvünün 58-ci dəqiqədə sarı vərəqə aldığını da nəzərinizə çatdıraq.
Aprelin 11-də Almaniya Regional Liqasının Şimal-Şərq zonasında 22-ci turdan təxirə salınan “Dinamo” – “Oberlausitz” oyunu keçirilib. Berlindəki görüşdə qalib müəyyənləşməyib – 1:1. Bundan öncə baş tutan “Germania” ilə matçda (4:2) dublunu rəsmiləşdirdikdən sonra zədələnərək meydanı tərk edən Rüfət Dadaşov komandasının son qarşılaşmasının iştirakçısı olmayıb. 53 xalla 2-ci yerdə gedən “ayılar” bazar günü 29-cu tur çərçivəsində Leyptsiqdə “Kemi”ni sınağa çəkəcək.
Portuqaliyanın 1-ci divizionunda isə 33-cü turun oyunları baş tutub. “Sportinq”in əvəzediciləri evdə “Famalikan”ın müqavimətini qıra bilməyib – 1:1. Budaq Nəsirovun adı görüşün iştirak ərizəsinə salınmayıb. 33 xalda qalan və 18-ci pilləyə geriləyən “zolaqlılar” növbəti turda səfərdə “Portu”nun ikinci komandası ilə münasibətləri aydınlaşdıracaq.