12 okt 17:50aktual

BOS-da monitorlar üçün kabellər quraşdırılıb

BOS-da monitorlar üçün kabellər quraşdırılıb
Cəmilə Sultanova: “Jurnalistlərə xüsusi geyim veriləcək”
“Qarabağ” – “Roma” oyunu Çempionlar Liqasının qrup mərhələsi çərçivəsində ölkəmizdə keçirilən ilk görüş olmaqla yanaşı, Bakı Olimpiya Stadionu adına uğursuz sınaq kimi tarixin yaddaşına düşdü. Azarkeşlər giriş-çıxışda tıxaca düşdü, jurnalistlərin sərbəst işləməsi üçün lazımi şərait yaradılmadı. Azarkeşlər üçün ayrılmış, “Qara Qarayev” və “Gənclik” metrostansiyalarından hərəkət edən xüsusi avtobusların marşrutu “Koroğlu” metrostansiyasında yekunlaşdı. Bu da insanların vaxtında stadiona çatıb, yerini erkən tutmasına əngəl oldu. Polislərin qurduğu sədlər isə yağış altında islanan adamları lap hövsələdən çıxardı.
Mətbuatın qəzəblənməsi üçün də yetərincə əsas var idi. Sanki stadionun tikintisi zamanı təbiət hadisəsi nəzərə alınmayıb. Oturacaqların üzərini örtməli olan tavandakı boşluqlar yağış sularının media sektorundakı masaları islatması üçün kifayət edirdi. Nəticədə kompüterlər bundan zərər görürdü. Belədə cihazları işlətməkdənsə, qatlayıb çantaya qoymaq məsləhət idi. Yəqin ki, italyan jurnalistlər təşkilatçılıqla bağlı çatışmazlıqlara görə Bakıdan xoş təəssüratla qayıtmayıb. Çünki yağış altında islanmaq fonunda internet problemi “bonus” idi. Hələ fasilədə media üçün ayrılmış qida məhsullarında da qıtlıq müşahidə olundu.
Sıradan stadionda belə problemlərlə üzləşsəydik, adamı yandırmazdı. Söhbət 2019-cu ildə Avroliqanın finalını qəbul edəcək Bakı Olimpiya Stadionundan gedir. Bu baxımdan arenada belə nəzərəçarpan qüsurlara yol verilməməlidi. Görək “Atletiko” ilə matç ərəfəsində bu nöqsanlar aradan qaldırılıbmı? Yoxsa yenə eyni problemlərlə üz-üzə qalacağıq?
BOS-un mətbuat xidmətinin rəhbəri Cəmilə Sultanovanı dinləyək: “Problemlərin həlli üçün təşkilatçılığa məsul bütün tərəflərlə birgə iş görürük. Hər oturacağın önündə olmasa da, bir neçə jurnalistin əyləşdiyi masanın önündə monitorlar quraşdırılacaq və oyunu ordan da izləmək mümkün olacaq. Artıq monitorlar üçün kabellər quraşdırılıb. Ancaq AÇ-2020 üçün monitorlar və oturacaqlar yenilənəcək. Bunu vaxtı çatanda UEFA özü təşkil edəcək. Proqnozlara görə “Atletiko” ilə oyun günündə yağıntı gözlənilmir. Ancaq yağış olsa belə, bunun qarşısını ala bilmərik. Bu, təbiət hadisəsidi. Jurnalistlərə xüsusi geyim veriləcək. Əlimizdən gələn budu. Çünki yağışa qarşı biz heç nə edə bilmərik. Bu gün (dünən) “Qarabağ”ın mətbuat katibi Nurlan İbrahimovla görüşmüşəm. Artıq yeməyin sifariş olduğunu və bu dəfə qidalanmayla bağlı problemin olmayacağını söylədi. Avtobuslarla bağlı məndə məlumat yoxdu. Yəqin ki, yenə Bakı Nəqliyyat Agentliyi avtobuslar ayıracaq. Bu haqda yeni məlumat olan kimi ictimaiyyətə açıqlayacağıq. Əksəriyyət şikayət edir ki, metro stadiondan uzaqdı. Avtobuslar da metroya kimi daşıyır. Məndə olan məlumata görə, böyük kütlənin eyni vaxtda stadion ətrafında toplaşmaması üçün atılmış addımdı. Bu da təhlükəsizlik mülahizələrindən irəli gəlir”.
SƏRXAN
Şərh yaz
Ваше Имя:
Ваш E-Mail:
Yağlı Əyilmiş Xətt altdan Xətt öndə | Sol tərəflə yığ Mərkəzdə Sağ tərfdə yığ | smayl qoşmaq Bağlantı qoşmaqBağlantı ilə qorunan Rəng seçimi | Gizli mətn Məqalə qoş seçilən mətni kril əlifbasına çevir Spoyler